Op 31 Augustus 2022 het LVS en HVS bymekaar gekom en aan ‘n heerlike lofprysingsaand deelgeneem. Om deel te kon wees van die geleentheid moes elke landsdiener ‘n blikkie kos of nie-bederfbare produk saambring wat aan die Margery Parks TB Hospitaal geskenk word.
Die Kewertjie het omtrent gebulder van die stemme en met groot glimlagte sluit ons die aand af met “Kumbaya”. Baie dankie aan elke leerder wat ‘n bydrae gemaak het. Ons dank ook die Here dat ons Sy naam kan loof en prys.
Op 1 September 2022, vertrek LVS se landsdiensbestuur na Margery Park Hospitaal en lewer die kos af. Ons bid dat die voedsel ‘n seëning vir elkeen sal wees.
